ჩვენ შესახებ
„სამეფო აბანო“ აბანოთუბნის ისტორიული მემკვიდრეობის ნაწილია — სივრცე, რომელიც XVIII საუკუნიდან ინარჩუნებს ძველი თბილისის აბანოს ხასიათსა და ატმოსფეროს.
მისი სახელიც ისტორიულ გადმოცემას უკავშირდება: ამბობენ, რომ ეს ადგილი მეფე ერეკლე II-ის დასვენების ერთ-ერთი საყვარელი სივრცე იყო. აღმოსავლური არქიტექტურა, ბუნებრივი გოგირდის წყალი და აბანოს ტრადიციული კულტურა დღემდე განსაზღვრავს „სამეფო აბანოს“ იდენტობას.
ჩვენი სურვილია, „სამეფო აბანოში“ სტუმრობა მხოლოდ განტვირთვით არ შემოიფარგლებოდეს — გვინდა, თითოეულმა სტუმარმა შეიგრძნოს ძველი თბილისის განსაკუთრებული ატმოსფერო და რამდენიმე საათით იმ ეპოქაში გადაინაცვლოს, როდესაც გოგირდის აბანოები ქალაქის ცხოვრების განუყოფელი ნაწილი იყო.
ისტორია
თბილისის ისტორია ბუნებრივ ცხელ წყაროებს უკავშირდება. ლეგენდის თანახმად, მათი აღმოჩენა მეფე ვახტანგ გორგასლის სახელს უკავშირდება და სწორედ ამ ადგილას დაიწყო ქალაქის განვითარება.
აბანოთუბანში ჩატარებული არქეოლოგიური კვლევები ადასტურებს, რომ აბანოს კულტურა თბილისის ცხოვრების ნაწილია საუკუნეების განმავლობაში. ქალაქის გოგირდის აბანოებზე წერენ სხვადასხვა ეპოქის მოგზაურები და ავტორები, მათ შორის მუჰამად იბნ ჰაუკალი, მარკო პოლო, ვახუშტი ბაგრატიონი და ალექსანდრე დიუმა.
ძველ თბილისში აბანო მხოლოდ ჰიგიენის ადგილი არ ყოფილა. აქ ადამიანები ხვდებოდნენ ერთმანეთს, საუბრობდნენ, ისვენებდნენ, ახალ ამბებს ცვლიდნენ და საქმიან საკითხებსაც განიხილავდნენ.
აბანოთუბანში დღემდე შემორჩენილი მრავალი აბანო XVII–XVIII საუკუნეების სპარსული არქიტექტურის გავლენას ატარებს. სწორედ ამ ისტორიულ გარემოში ჩამოყალიბდა „სამეფო აბანო“, როგორც ძველი თბილისის აბანოს კულტურის ნაწილი.
გოგირდის წყალი
თბილისის ბუნებრივი გოგირდის წყაროები აბანოთუბნის ერთ-ერთი მთავარი განმსაზღვრელი ელემენტია და ქალაქის აბანოს ტრადიციის საფუძველს წარმოადგენს.
მიწის სიღრმიდან ამოსული თერმული წყალი ბუნებრივად შეიცავს მინერალებსა და გოგირდოვან ნაერთებს და გამოირჩევა დამახასიათებელი ტემპერატურითა და სუნით. სწორედ ამ წყლების გარშემო განვითარდა თბილისის მრავალსაუკუნოვანი აბანოს კულტურა.
გოგირდის თბილი წყალი განსაკუთრებით ასოცირდება სხეულის მოდუნებასთან, დასვენებასთან და ფიზიკური დაძაბულობის შემსუბუქებასთან — გამოცდილებასთან, რომელიც აბანოთუბანში საუკუნეების განმავლობაში თაობიდან თაობას გადაეცემოდა.
ქიმიური შემადგენლობა და ტრადიციული ბალნეოლოგიური გამოყენება
თბილისის გოგირდის წყლები მიეკუთვნება ბუნებრივ გოგირდ-ტუტოვან თერმულ მინერალურ წყლებს და ხასიათდება შედარებით სტაბილური ტემპერატურითა და მინერალური შემადგენლობით.
ტრადიციულად, ისინი გამოიყენებოდა ბალნეოლოგიურ პროცედურებში და უკავშირდებოდა:
- სახსრებისა და საყრდენ-მამოძრავებელი სისტემის გარკვეულ მდგომარეობებს, მათ შორის ართრიტს, სპონდილოზსა და ტრავმის შემდგომ დისკომფორტს;
- კუნთებისა და პერიფერიული ნერვული სისტემის დისკომფორტს, მათ შორის ნევრალგიას, ნევრიტსა და რადიკულიტს;
- სხეულის მოდუნებას, დაძაბულობის შემცირებასა და საერთო განტვირთვას.